Ambasada e Britanisë së Madhe në Kosovë ka vlerësuar pozitivisht bashkëpunimin ndërmjet misionit të KFOR-it, të udhëhequr nga NATO, dhe Forcës së Sigurisë së Kosovës (FSK), gjatë operacionit të kërkim-shpëtimit të zhvilluar pas zhdukjes tragjike të një personi në Liqenin e Ujmanit (Gazivodë).

Sipas njoftimit të Ambasadës, operacioni është zhvilluar me autorizim të Komandantit të KFOR-it, që mundësoi vendosjen e ekipeve të specializuara të FSK-së.

Ky angazhim u cilësua si një dëshmi e qartë e aftësive të avancuara të Forcës së Sigurisë së Kosovës, dhe në përputhje të plotë me marrëveshjet ekzistuese ndërmjet KFOR-it dhe FSK-së.

“Operacioni është testament për përsosmërinë e aftësive të Kërkim-Shpëtimit të FSK-së dhe në përputhje me marrëveshjet e gjata midis KFOR-it dhe FSK-së. Ne e përgëzojmë KFOR-in për ofrimin e mbështetjes dhe sigurisë gjatë gjithë këtij operacioni dhe i ofrojmë ngushëllime familjes së njeriut që mjerisht humbi jetën,” thuhet në deklaratën e Ambasadës britanike.

Gjithashtu, Britania e Madhe ka theksuar përkushtimin e saj të vazhdueshëm për të mbështetur misionin e KFOR-it dhe rolin e tij thelbësor në ruajtjen e paqes dhe stabilitetit në Kosovë, duke nënvizuar rëndësinë e bashkëpunimit ndërinstitucional në situata emergjente dhe operacione të ndjeshme./Arbresh.info